ചൂല്‍

 

വടക്കിനിയിലെ

പത്തായ മൂലയില്‍

പുലരി വെളുക്കും മുമ്പേ

ഉറക്കമിളച്ചു കാത്തിരിക്കുന്നുണ്ടാവും,
ഉമ്മയെ..

അടുപ്പുതിണ്ണയിലെ

വെണ്ണീര്‍ തിന്ന്

സവാരി തുടങ്ങണം,

എന്നും..

വടക്കേ മുറ്റത്തെ

വിറകുപുരയും കഴിഞ്ഞ്

കിണറ്റിന്‍ കരയിലെത്തുമ്പോഴെക്ക്

കഴിഞ്ഞ രാത്രിയില്‍

കാറ്റുപെറ്റതെല്ലാം

തുടച്ചെടുക്കണം.

അടുക്കള മച്ചിലിരുന്ന്

കണ്ണുരുട്ടിയ പൂച്ചക്ക് വേണ്ടി
ചുഴറ്റിയെറിഞ്ഞിട്ടുണ്ടൊരിക്കല്‍
ഉപ്പ.

ഓടിയൊളിച്ച
എട്ടുകാലികള്‍ക്ക് വേണ്ടി
വെറുതെ തല്ലുകൊണ്ടിട്ടുണ്ട്
പലവട്ടം.

എന്നിട്ടും,
ചടഞ്ഞിരിക്കുമ്പോള്‍
"ചൂലേ" യെന്ന  തെറിവിളി
സഹിക്കാനാവില്ല,
ഒരിക്കലും..